#АвстралидИрсэнЭхнийЖилүүд

Манай гэр бүл Австралид ирээд аль хэдийн 6 жилийг ардаа үлдээжээ.

Шинэ улс, шинэ нийгэм, шинэ орчинд дасан зохицоно гэдэг мэдээжийн амаргүй байсан . Ялангуяа цаг агаар, амьдралын хэмнэл, өдөр тутмын хөдөлмөрийн нөхцөл байдал гээд олон зүйл дээр хүн өөрийгөө шинээр сорьдог юм байна лээ.

Ирсэн жилээ би танил хүнийхээ зуучлалаар компаниудын сурталчилгааг заасан байршлуудад очиж, өглөөний ургах нартай зэрэгцэн босоод айл өрх, орон сууц олноор төвлөрсөн бүсүүдээр алхаж, шуудангийн хайрцагт сурталчилгааны материал тараадаг ажлыг хийж эхэлсэн. Өдөртөө дунджаар 6–8 цаг тасралтгүй алхана. Бороо орсон ч, салхи шуурсан ч, халуун, хүйтэн аль нь байсан ч ажил зогсохгүй. Ингэж би Австрали дахь анхны ажлаа 1 жил 6 сар тасралтгүй хийсэн юм.

#БорооӨдөрЗөрсөнНэгМөч

Нэг бороотой өдөр, яг л энгийн ажлынхаа нэгэн өглөө, би ажлаа хийж яваад ойролцоогоор 50 гаруй насны нэг эрэгтэй, нэг эмэгтэй хоёртой зөрсөн юм. Тэд хоёулаа их даруухан хэрнээ нүдэнд дулаахан, загварлаг харагдаж байсан. Хамгийн сонирхол татсан нь — тэдний өмссөн урт хүрэм байлаа. Бороотой байсан ч усны дусал нь хүрмийг нь нэвт норголгүй, гадаргуу дээр нь гулсаад л унаж байсан нь шууд анзаарагдсан. Би өөрийн эрхгүй зөрөөд өнгөрснийх нь дараа эргэж харсан. Тэр үед л “ямар гоё юм бэ” гэсэн бодол анх төрсөн.

Тэр өдрөөс хойш би дотроо тэр хүрэмний талаар илүү ихийг мэдэх хүсэлтэй болж, зав гарсан үедээ судалж эхэлсэн юм. Ингэж явсаар oilskin гэж юу вэ, яагаад ийм удаан хэрэглэгдэж ирсэн бэ, ямар түүхтэй материал вэ гэдгийг аажмаар ойлгож эхэлсэн.

#Oilskin гэж юу вэ?

Oilskin гэдэг нь өнөө үеийн хиймэл мембран, нейлон, полиэстрээс өмнө үүссэн, байгалийн гаралтай ус нэвтрэхгүй болгох технологи юм. Түүхийн хувьд 18-р зууны сүүл, 19-р зууны эхэн үед Европын далайчид, загасчид, боомтын ажилчид бороо, салхинаас хамгаалахын тулд хөвөн даавууг тос, өөх тос, улмаар маалинган тосоор шингээж боловсруулан хэрэглэж эхэлсэн байдаг. Энэ нь хиймэл материал хараахан бий болоогүй байсан цаг үед бодит хэрэгцээнээс үүссэн шийдэл байв.

Oilskin-ийн гол онцлог нь даавууг бүрэн “битүүлэх” биш, харин усыг нэвтрүүлэхгүй мөртлөө агаар солилцоог хадгалж үлддэгт оршдог. Тиймээс PVC, резинэн борооны цув шиг дотор талаасаа ууршиж хөлөргөдөггүй. Ус гадаргуу дээр нь шингэхгүй гулсаж унадаг ч, даавуу нь “амьсгалж” байдаг учраас удаан өмсөхөд биед эвтэйхэн. Мөн энэ материал нас ахих тусам зөөлөрч, хүний хөдөлгөөнд илүү зохицдог гэдгээрээ онцлог.

#Яагаад Австралид oilskin соёл болсон бэ?

Энэ технологи яагаад Австралид онцгой байр суурь эзэлсэн бэ гэвэл, энэ нь тус улсын амьдралын хэв маяг, уур амьсгалтай шууд холбоотой. Австралид өглөө нарлаг байгаад, өдөр салхилж, орой бороо орох нь энгийн үзэгдэл. Мал аж ахуй, фермийн ажил, гадаа удаан явах хөдөлмөр түгээмэл. 19-р зуунаас эхлэн stockman, drover буюу мал туух ажилтан, фермерүүд oilskin хүрмийг өдөр тутмын ажлын хувцас болгож хэрэглэж ирсэн нь учиртай. Бороо салхинаас хамгаална, урагдвал засна, олон жил өмсөнө. Ингэж oilskin нь Австралид зүгээр нэг хувцас биш, ажил хөдөлмөр, соёл, уламжлалын нэг хэсэг болсон юм.

#Монгол хүнд яагаад тохирох вэ?

Эндээс Монголын нөхцөл рүү харахад, oilskin яагаад тохирох вэ гэдэг нь таамаг биш, логик үндэслэлтэй харагдана. Монгол орон салхи ихтэй, улирлын шилжилт огцом, хавар намартаа гэнэт бороо орох нь элбэг. Гадаа удаан явах, хөдөө орон нутагт ажиллах, байгальтай ойр амьдрах, загасчилал, морьтой холбоотой бүхий л нөхцөл зүйлд бидэнд танил. Oilskin нь салхийг сайн барина, бороонд нэвчихгүй, харин синтетик куртка шиг хөлөргөж “уур савсуулахгүй”. Дотор нь дулаан хувцас давхарлаж өмсөх боломжтой учраас улирлын шилжилтэд маш уян хатан. Хамгийн чухал нь — урагдлаа ч хаях биш, засаж нөхөөд цааш үргэлжлүүлэн хэрэглэдэг. Энэ нь Монгол ахуйд огт танихгүй ойлголт биш.