Дэлхийн олон оронд аялал гэдэг нь ихэвчлэн амралтын газар очих, зочид буудалд байрлах, хот үзэхтэй холбоотой байдаг. Харин Австраличуудын хувьд аялал гэдэг ойлголт арай өөр. Тэдний хувьд аялал бол байгальд гарах, хол зам туулж шинэ газар нээх, өөрийгөө сорих, найз нөхөд, гэр бүлтэйгээ хамт цагийг өнгөрөөх нэг төрлийн амьдралын соёл юм. Тиймээс Австралид “road trip”, “bush camping”, “outback adventure” гэх ойлголтууд маш түгээмэл байдаг.

Австралийн газар нутаг асар уудам, хот суурингууд хоорондоо хол зайтай байдаг тул хүмүүс багаасаа л хол замд гарах, байгальд цагийг өнгөрөөх дадалтай өсдөг. Амралтын өдрүүдэд олон гэр бүл машинаа бэлдэж, хэдэн зуун километр зам туулан далай, уул, эсвэл хээр талд очиж амардаг. Зарим нь загасчилж, зарим нь морь унаж, зарим нь зүгээр л галын дэргэд сууж шөнийн тэнгэрийн оддыг харж суух дуртай. Энэ бүхэн Австраличуудын хувьд тансаг зүйл биш, харин өдөр тутмын амьдралын нэг хэсэг юм. Австраличуудын онцлог нь тэд байгальтайгаа маш ойр амьдардагт оршино. Хотод амьдардаг хүмүүс хүртэл боломж гарвал аль болох байгаль руу гарч, чөлөөт цагийг гадаа өнгөрөөхийг хичээдэг. Тиймээс аялалд явахдаа тэд ихэвчлэн энгийн, практик, удаан хэрэглэгдэх зүйлсийг сонгодог. Илүү чамин харагдахаас илүүтэй тухтай, бат бөх, олон нөхцөлд тохирох байдал нь илүү чухал байдаг. Өөр нэг сонирхолтой зүйл бол Австраличуудын аяллын соёлд өөрөө хийх, өөрөө бэлдэх гэсэн ойлголт маш хүчтэй байдаг.

Жишээ нь, хүмүүс аялалд гарахдаа хоол хүнсээ өөрсдөө бэлдэж, майхан барьж, гал асааж, замаа төлөвлөж явдаг. Энэ нь аяллыг илүү сонирхолтой, бодит туршлага болгодог. Хүмүүс зөвхөн зорьсон газартаа хүрэхээс илүүтэй замдаа өнгөрүүлэх цагийг илүү үнэ цэнтэй гэж үздэг. Тиймээс Австраличуудын аяллын хэв маягийг нэг үгээр тайлбарлавал эрх чөлөө гэж хэлж болно. Хаашаа ч явж болно, хэдийд ч аялж болно, байгальд өөрийнхөөрөө цагийг өнгөрөөж болно. Энэ нь Австралийн соёлын нэг онцлог бөгөөд дэлхийн бусад орноос ялгарах нэг шалтгаан юм.

Магадгүй энэ л шалтгаанаар Австраличуудын аялал үргэлж адал явдал, шинэ нээлт, байгальтай ойр байх мэдрэмжийг агуулж байдаг.